“Fəxr edirəm ki, mən azərbaycanlıyam”

Heydər Əliyev
13.10.2009, 08:48
75

Dağlıq Qarabağın azərbaycanlı icması Türkiyə ictimaiyyətinə müraciət edib

A- A+

“İşğalın davam etdiyi halda Türkiyənin Ermənistana qapı açması bu ölkəni işğalı davam etdirməyə təşviq edəcək”

“Azərbaycan Respublikasının Dağlıq Qarabağ bölgəsinin azərbaycanlı icması” İctimai Birliyi idarə heyətinin iclasında 2009-cu il oktyabrın 10-da Türkiyə və Ermənistan arasında münasibətlərin normallaşdırılması, diplomatik əlaqələrin yaradılmasına dair protokolların imzalanması ilə bağlı qardaş ölkənin ictimaiyyətinə müraciət qəbul olunmuşdur. 

Müraciətdə deyilir: “Azərbaycan Respublikasının Dağlıq Qarabağ bölgəsinin azərbaycanlı icması Türkiyə və Ermənistan arasında münasibətlərin qurulması barədə protokolların imzalanması xəbərini dərin narahatlıqla qarşılamışdır.

Biz Türkiyə Cümhuriyyətinin qonşu Ermənistanla öz tarixi problemlərinin həllinə və beləliklə də, bu ölkə ilə münasibətlərinin normallaşdırılmasına yönəlmiş səylərinin böyük əhəmiyyətə malik olduğunu anlayırıq. Lakin bununla yanaşı bildiririk ki, hazırkı şəraitdə Türkiyə və Ermənistan arasında sərhədlərin açılması həm Türkiyə, həm də ona yaxın olan qardaş Azərbaycan vətəndaşları üçün kəskin nəticələrə gətirib çıxara bilər.

Ermənistan tərəfindən zəbt olunmuş Azərbaycan ərazilərinin işğalının davam etdiyi bir vaxtda Türkiyənin Ermənistanla sərhədinin açılması Azərbaycan Respublikası Prezidentinin Ermənistanı beynəlxalq hüququn norma və prinsiplərinə, Azərbaycanın ərazi bütövlüyünə və sərhəd toxunuzmalığına hörmətlə yanaşmağa, işğal altında olan bütün ərazilərin boşaldılmasına və ordan qovulmuş azərbaycanlıların öz doğma yurd-yuvalarına geri qayıtmasına şərait yaratmağa məcbur etməyə yönəlmiş səylərinə böyük zərər vuracaqdır.

İşğalın davam etdiyi indiki halda Türkiyənin Ermənistana qapısını açması, bu ölkə ilə iqtisadi əlaqələr yaradıb orada sərmayə yatırımı həyata keçirməsi onu işğalçı siyasətini davam etdirməyə təşviq edəcəkdir.

Ermənistanın təcavüzkar siyasəti nəticəsində Azərbaycan Respublikasının Dağlıq Qarabağ bölgəsi və ətrafdakı yeddi rayon işğal olunmuşdur. Neçə illərdir ki, həmin rayonların sakinləri olan azərbaycanlılar, o cümlədən biz - Dağlıq Qarabağ azərbaycanlıları öz doğma torpaqlarımıza qayıda bilmirik. Bu illər ərzində torpaqlarımız və evlərimiz ermənilər tərəfindən istismar və talan olunur. Biz öz doğma yurd-yuvalarımıza qayıtmaq istəyirik.

Dağlıq Qarabağın hüquqi statusu yalnız bölgənin azərbaycanlı icması geri qayıtdıqdan sonra beynəlxalq hüququn norma və prinsiplərinə uyğun olaraq həll edilməlidir. İşğal bitmədiyi halda Türkiyənin sərhədlərini Ermənistanın üzünə açması biz azərbaycanlıların Dağlıq Qarabağ və ətraf rayonlara qayıtmasına əngəl törədəcəkdir.

Azərbaycan ərazilərinin işğaldan azad olunması və didərgin düşmüş bütün azərbaycanlıların, o cümlədən bizim Dağlıq Qarabağ da daxil olmaqla öz torpaqlarımıza qayıtmağımız naminə sizə üz tutub müraciət edirik ki, Türkiyə sərhədlərinin Ermənistanın üzünə açılmasına və işğalçının haqsız təşviq edilməsinə yol verməyəsiniz.

Türkiyənin Ermənistan ilə əlaqələrinin normallaşdırılmasına yönəlmiş səyləri Ermənistanın Azərbaycana qarşı işğalı bitməyincə uğurla nəticələnə bilməz. Regionda Türkiyənin marağında olduğu sülh və təhlükəsizliyin bərpa edilməsi Ermənistan ilə Azərbaycan arasında olan münaqişənin həllindən bilavasitə asılıdır.

Azərbaycan Respublikasının Dağlıq Qarabağ bölgəsindən zorla qovulmuş azərbaycanlıların icması inanır ki, Türkiyə və Azərbaycan dostluğu əbədidir, regionun gələcəyi məhz iki qardaş ölkənin qarşılıqlı əməkdaşlığından asılıdır”.

 

Mövzuya dair:

Ermənistanla imzalanmış protokollar oktyabrın 21-də Türkiyə Böyük Millət Məclisində müzakirəyə çıxarılacaq

-13.10.2009-

Türkiyə və Ermənistan arasında imzalanmış protokollar gələn həftə Türkiyə Böyük Millət Məclisinə göndəriləcək. Bu barədə Türkiyə baş nazirinin müavini, hökumət sözçüsü Cəmil Çiçək Nazirlər Kabinetinin oktyabrın 12-də keçirilmiş iclasından sonra bildirib.

İclasda Xarici İşlər Nazirliyinin protokollar barədə məlumat verdiyini deyən C. Çiçək sənədlərin oktyabrın 21-də TBMM-də müzakirəyə çıxarılacağını söyləyib.

Protokolların imzalanmasının əhəmiyyətini vurğulayan hökumət sözçüsü bunun Türkiyə-Ermənistan münasibətlərinin normallaşmasında mühüm məqam olduğunu qeyd edib: “Protokollarda gizli heç nə toxdur. Səmimi və ciddi iradə ortaya qoyduq. Türkiyə böyük və güclü bir dövlətdir. Bütün qonşularla olduğu kimi, ermənilərlə də sülh istəyirik. Müharibələrin heç kimə faydası yoxdur.

Lakin davamlı sülh və sabitlik Ermənistanın işğal etdiyi Azərbaycan torpaqlarından çəkilməsi ilə mümkündür. Bizim Azərbaycanla münasibətlərimiz qardaşlıq səviyyəsindədir. Heç bir proses Azərbaycan və Türkiyə dostluğundan əhəmiyyətli deyil”.

C. Çiçək Ermənistanla münasibətlərin normallaşması istiqamətində prosesin Dağlıq Qarabağ münaqişəsinin həlli yolunda səylərin də artırılmasına təkan verdiyini vurğulayıb: “Bu proses başladıqdan sonra Dağlıq Qarabağ münaqişəsinin nizamlanmasında vasitəçilik missiyasını üzərinə götürmüş ATƏT-in Minsk qrupu da aktivləşib. Azərbaycan və Ermənistan prezidentləri arasında görüşlərin intensivliyi də artıb”.

Xəbərlər
Redaktorun seçimi