Azərbaycanlı.org

Qarabağ üzrə vasitəçilər bəyanat yayıblar

Həmsədrlər Ermənistanla müzakirələri intensivləşdirəcəklər

-08.03.2010-

ATƏT-in Minsk Qrupunun həmsədrləri Azərbaycanın xarici işlər naziri Elmar Məmmədyarovla martın 5-də Parisdə keçirdikləri görüşlə bağlı bəyanat yayıblar.

APA-nın ATƏT-in rəsmi saytına istinadən verdiyi məlumata görə, bəyanatda deyilir: “ATƏT-in Minsk Qrupunun həmsədrləri Yuri Merzlyakov (Rusiya), Bernar Fasie (Fransa) və Robert Bradtke (ABŞ) Parisdə Azərbaycanın xarici işlər Naziri Elmar Məmmədyarovla görüşüblər. Onlar danışıqların hazırkı mərhələsini dəyərləndirib, 2009-cu ilin dekabrında və 2010-cu ilin yanvarda həmsədrlər tərəfindən təqdim olunmuş Madrid prinsiplərinin yenilənmiş variantına Azərbaycan və Ermənistan tərəfinin münasibətini müzakirə ediblər".

Bəyanatda qeyd olunur ki, regiona səfər etməzdən əvvəl həmsədrlər bu ay Parisdə Ermənistan xarici işlər naziri Edvard Nalbandyanla da görüşüb eyni müzakirələri aparmağı planlaşdırırlar.

* * *

Həmsədrlər Ermənistan tərəfi ilə müzakirələri daha da intensivləşdirəcəklərini bildiriblər

Azərbaycanın xarici işlər naziri Elmar Məmmədyarovla ATƏT-in Minsk Qrupunun həmsədrləri Parisdə Ermənistan-Azərbaycan, Dağlıq Qarabağ münaqişəsinin həlli ətrafında gedən danışıqlar prosesini hərtərəfli və dərindən müzakirə ediblər.

Xarici İşlər Nazirliyinin (XİN) mətbuat katibi Elxan Poluxovun APA-ya verdiyi məlumata görə, nazir Azərbaycan tərəfinin yeniləşdirilmiş Madrid təklifləri əsasında təklif olunan sənədi bəzi istisnalar olmaqla, ümumilikdə qəbul etdiyi bir daha vasitəçilərin nəzərinə çatdırıb. Həmsədrlər isə bildiriblər ki, rəsmi Yerevanla işləri davam etdirəcək, Ermənistan tərəfi ilə bu məsələ ətrafında müzakirələri daha da intensivləşdirəcəklər.

E. Məmmədyarovun Fransa prezidentinin xarici məsələlər üzrə müşaviri Jan-David Levita ilə görüşündə də eyni mövzu ətrafında geniş müzakirələr aparılıb, nazir Azərbaycan tərəfinin mövqeyini Fransa prezidentinin müşavirinə çatdırılıb.

Müşavir Sarkozinin bu məsələni şəxsi nəzarətində saxlayacağını vurğulayıb. O, həmçinin Fransa tərəfinin bu məsələnin həllinə dair səylərini artıracağını da bildirib.