QHT Şurası 2009-cu ilin yekunlarına dair hesabat verib

-28.01.2010-

Azərbaycan Respublikası Prezidenti yanında QHT-lərə Dövlət Dəstəyi Şurası 2009-cu ildə göstərdiyi fəaliyyətə dair hesabatı açıqlanıb.

APA-nın məlumatına görə, bununla bağlı keçirilən tədbirdə çıxış edən şuranın sədri Azay Quliyev QHT-lər üçün maliyyə müsabiqəsi keçirildiyini, müsabiqəyə təqdim olunan 613 layihədən 248-nin icrası üçün 2 milyon 68 min manat vəsaitin ayrıldığını qeyd edib.

Bundan əlavə, şura mütəmadi olaraq layihələrin icrasına nəzarət edib, aparılan monitorinqlərlə bağlı ictimaiyyətə açıqlamalar verilib.

A. Quliyev QHT-lər haqqında qanunvericiliyin təkmilləşdirilməsi, beynəlxalq əlaqələr istiqamətində də addımların atıldığını qeyd edib. O, QHT-lərin məlumat bazasının yaradıldığını və artıq 800-ə qədər QHT-nin koordinatlarının toplandığını da qeyd edib.

Tədbirdə şuranın direktoru Fərasət Qurbanov çıxış edərək ötən il layihə həyata keçirən QHT-lərin monitorinqinin aparıldığını deyib və bu monitorinqin nəticələri ilə bağlı məlumat verib. O bir sıra təşkilatların ümumiyyətlə monitorinq üçün şərait yaratmadığını, bəzi təşkilatların hesabatlarının düzgün hazırlanmadığını, maliyyə yardımının bəzən düzgün xərclənmədiyini qeyd edib.

Bununla bərabər, o kifayət qədər səmərəli həyata keçirilən layihələrin də olduğunu qeyd edib.

2010-cu il üçün elan olunmuş maliyyə müsabiqəsi barədə danışan F. Qurbanov bəzi QHT-lərin təqdim etdiyi layihələrin düzgün tərtib edilmədiyini, tələb olunan sənədlərin qaydasında olmadığını deyib.

Tədbirdə iştirak edən QHT-lərin nümayəndələri şuranın fəaliyyəti, layihələrin maliyyələşməsi və digər məsələlərlə bağlı öz təkliflərini səsləndiriblər

 * * *

Azay Quliyev: “Ötən il maliyyə vəsaiti almış bəzi təşkilatların fəaliyyəti bizi qane etmir”

2009-cu ildə Qeyri Hökumət Təşkilatlarına Dövlət Dəstəyi Şurasından maliyyə vəsaiti almış təşkilatların bəzilərinin fəaliyyəti şuranı qane etmir. APA-nın məlumatına görə, bu barədə şuranın sədri Aza Quliyev məlumat verib.

Onun sözlərinə görə, bəzi QHT-lər hesabatları vaxtında təqdim etməyib, şuranın monitorinqinə lazımı şəraiti yaratmayıb, şura ilə imzaladığı müqavilənin öhdəliklərinə əməl etməyib, bütövlükdə layihənin icrası ilə bağlı işlərin lazımı səviyyədə həyata keçirməyib:

“Bir QHT-yə ayırdığımız maliyyənin ikinci hissəsini ödəməkdən imtina etdik. Ümumilikdə 8 QHT bu il müsabiqədə şuradan dəstək almayacaq. Amma ümumilikdə 30-a yaxın QHT-nin fəaliyyəti bizi qane etmir. Bu cür QHT-ləri 2 il keçirdiyimiz müsabiqələrdə iştirakdan məhrum etmək hüququmuz var”.