ABŞ Dağlıq Qarabağ adlı qurumu tanımır

-28.01.2010-

Birləşmiş Ştatların Dövlət Departamenti Dağlıq Qarabağ ermənilərinə birbaşa maliyyə yardımı ayrılması ilə bağlı Azərbaycanın etiraz notasına rəsmi cavab verib.

ABŞ Konqresi 2010-cu il üzrə xarici maliyyə yardımı büdcəsində Dağlıq Qarabağ ermənilərinə ayrıca bənd üzrə birbaşa maliyyə yardımının ayrılması barədə qərar qəbul etdikdən sonra rəsmi Bakı ötən ilin dekabrında Vaşinqtona etiraz notası təqdim etmişdi.

XİN mətbuat katibi Elxan Poluxovun APA-ya verdiyi məlumata görə, nota Azərbaycanın ABŞ-dakı səfirliyinə yanvarın 26-da daxil olub.

Notada ABŞ administrasiyası tərəfindən Dağlıq Qarabağ adında qurumu tanımadığını bir daha bəyan edib.

Məktubda, eyni zamanda, bildirilir ki, ABŞ tərəfi Dağlıq Qarabağda keçirilən bütün proqramlarla bağlı Azərbaycan tərəfini açıq və şəffaf formada məlumatlandırmaq prinsipinə sadiq qalır.

 * * *

Bax həmçinin:

Sergey Lavrov və Hillari Klinton Dağlıq Qarabağ münaqişəsinin həllini müzakirə ediblər

-28.01.2010-

Rusiyanın xarici işlər naziri Sergey Lavrov Londonda ABŞ dövlət katibi Hillari Klintonla görüşüb.

APA-nın Rusiya saytlarına istinadən yaydığı xəbərə görə, S. Lavrov Rusiya, Azərbaycan və Ermənistan prezidentlərinin Soçi görüşü haqqında həmkarına məlumat verib.

S. Lavrov Rusiyanın ABŞ və Fransa ilə birlikdə ATƏT-in Minsk Qrupunun həmsədri olduğunu xatırladaraq deyib ki, görüşdə Dağlıq Qarabağ münaqişəsinin nizamlanması müzakirə edilib:

“Biz Soçi görüşünün nəticələri ilə bağlı fikir mübadiləsi apardıq. Bu, sadə məsələ deyil, amma onun həllini tapmaq üçün bütün tərəflərin istəyi var”.